Newyddion

Hyfforddiant diogelwch bwyd hanfodol i fusnesau

Mae swyddogion safonau masnach Cyngor Dinas Casnewydd wedi trefnu cyrsiau hyfforddiant alergenau bwyd i fusnesau lleol yn ddiweddar. 

Wedi'i ariannu gan y Gronfa Ffyniant Gyffredin, bu'r tair sesiwn yn llwyddiannus iawn a mynychwyd hwy gan 137 o bobl o 87 o fusnesau. 

Dywedodd y Cynghorydd James Clarke, yr aelod cabinet dros gynllunio strategol, tai a rheoleiddio: "Mae'n rhaid i bobl sy'n dioddef o alergeddau bwyd fod yn ofalus nad ydyn nhw'n bwyta unrhyw beth a fydd yn achosi adwaith. Gall y canlyniadau fod yn ddifrifol iawn a hyd yn oed peryglu bywyd ar adegau. 

"Mae gan fusnesau ddyletswydd gyfreithiol i wneud yn glir beth sydd mewn unrhyw fwyd maen nhw'n ei werthu a sicrhau nad yw'n peri risg i gwsmeriaid. 

"Rwy'n falch iawn bod cynifer o gynrychiolwyr cyfrifol safleoedd bwyd lleol wedi cydnabod pa mor hanfodol yw hyn ac wedi penderfynu cymryd rhan yn y sesiynau hyfforddiant rhad ac am ddim hyn a chadw cwsmeriaid yn ddiogel." 

Cafwyd adborth cadarnhaol gan y rhai a fynychodd y sesiynau gan gynnwys y canlynol: 

• Rhoddwyd enghreifftiau yn y sesiwn ac roedd popeth yn ddealladwy.
• Rhoddwyd llawer o wybodaeth dda a chafodd popeth ei esbonio’n dda iawn.
• Ces i wybod am alergenau newydd.
• Roedd yn addysgiadol ac fe atebwyd yr holl gwestiynau; rhoddodd ddolenni i wefannau am ragor o wybodaeth.
• Dysgais i am agweddau pwysig alergenau a pha mor hanfodol yw cael dealltwriaeth o alergenau.
• Roedd yn cadarnhau’r hyn yr oeddwn i yn ei wybod yn barod ac fe ychwanegodd at fy wybodaeth. 

Mae Cronfa Ffyniant Gyffredin y DU yn un o bileri canolog agenda Ffyniant Bro llywodraeth y DU ac yn darparu £2.6 biliwn o gyllid i’w fuddsoddi’n lleol erbyn mis Mawrth 2025. 

Nod y gronfa yw gwella balchder mewn ardaloedd a chynyddu cyfleoedd bywyd ledled y DU gan fuddsoddi mewn cymunedau ac ardaloedd, cefnogi busnesau lleol, a phobl a sgiliau. 

Mae'r Cyngor wedi derbyn mwy na £30 miliwn o'r gronfa ar gyfer ystod eang o brosiectau ledled y ddinas.